Mon. Aug 8th, 2022

கூட்டுறவு துறை நிர்வாகத்தின் கீழ் உள்ள கூட்டுறவு மருந்தகங்களுக்கு வரும் காலங்களில் நேரடியாக மருந்து தயாரிப்பு நிறுவனங்களிடம் இருந்தே மருந்துகளை கொள்முதல் செய்வதற்கான பேச்சுவார்த்தையை அரசு உயரதிகாரிகள் தொடங்கியுள்ளதாக தகவல் வெளியாகியுள்ளது. உயர் அதிகாரிகளின் இந்த முயற்சியை வரவேற்பதுடன், மக்களின் துயர் துடைக்க, சிந்திக்கவும் செயல்படவும் முன்னெடுப்புகளை எடுத்து வரும் அரசு அதிகாரிகளை, குறிப்பாக கூட்டுறவுத்துறை அதிகாரிகளை எவ்வளவு பாராட்டினாலும் தகும்.

ஆனால், காலம் தாழ்ந்து எடுக்கப்படும் முடிவுகளால் பொதுமக்களுக்கு எந்தளவுக்கு பணம் இழப்பு ஏற்பட்டுள்ளது என்பதையும் சுட்டிக்காட்ட வேண்டிய கடமை நல்லரசுக்கு இருக்கிறது.

மாநிலம் முழுவதும் உள்ள 300க்கும் மேற்பட்ட கூட்டுறவு மருந்தகங்களில் 20 சதவீதம் சலுகை விலையில் மருந்துகள் தற்போது விற்பனை செய்யப்பட்டு வருவதாக கூறப்படுகிறது. தனியார் மருந்துக் கடைகளில் எம்ஆர்பி எனும் அதிகபட்ச சில்லரை விலைக்குதான் மருந்துகள் விற்பனை செய்யப்பட்டு வருவதால், கூட்டுறவு மருந்தகங்களில் வழங்கப்படும் 20 சதவீதம் தள்ளுபடி, விளிம்பு நிலை மற்றும் நடுத்தர மக்களின் பணச்சுமையை ஓரளவுக்கு குறைப்பவையாகவே இருந்து வருகிறது.

இன்றைக்கு இருதய நோய், நீரழிவு, புற்றுநோய் உள்ளிட்டவற்றால் பாதிக்கப்பட்டவர்களின் எண்ணிக்கை கிராமம், நகரம் என்று வேறுபாடில்லாமல் நூற்றுக்கணக்கில், ஆயிரக்கணக்கில் என நாளுக்கு நாள் அதிகரித்துக் கொண்டே வருகிறது. அன்றாடம் மருந்துகள் உட்கொண்டால்தான் உயிர் வாழ முடியும் என்றளவுக்கான நோய் பாதிப்பு உள்ளவர்கள், மாதம் ஒன்றுக்கு குறைந்தது ஆயிரம் ரூபாய் அளவுக்கு மருந்து, மாத்திரைகளுக்கு மட்டுமே செலவழிக்க வேண்டிய நிர்ப்பந்தம் ஏற்பட்டுள்ளது.

இதே மருந்துகளை அரசு மருத்துவமனைகளில் விலையில்லாமல் வழங்கப்பட்டாலும், குறிப்பிட்ட நாட்களில் மட்டுமே மருந்துகள் வழங்கப்படும் என்ற நிபந்தனையாலும், கூட்டம் அதிகமாக இருக்கும் என்பதாலும் புதிய, பழைய நோயாளிகள் கூட, தனியார் மருந்தகங்களில்தான் மருந்துகளை வாங்குவதற்கு விரும்புகின்றனர். அதைவிட முக்கியமாக, அரசு மருத்துவமனையில் வழங்கப்படும் மருந்து, மாத்திரைகள் தரமற்றவையாக இருக்கின்றன என்று லாப நோக்கோடு மருத்துவ சேவையில் ஈடுபட்டுள்ள சிறப்பு மருத்துவர்கள் கூறும் ஆலோசனைகள், அறிவுரைகள் நோய் பாதிப்பிற்குள்ளானவர்களை அச்சுறுத்தி, தனியார் மருந்தகங்களில் மருந்துகள் வாங்க தூண்டப்படுகின்றன நிலைதான், எல்லா ஊர்களிலும் நிலவி வருகிறது.

ஆனால், கூட்டுறவு மருந்தகங்களைப் போலவே, ஒன்றிரண்டு தனியார் மருந்தகங்களும் 20 சதவீதம் அளவுக்கு தள்ளுபடி விலையில் மருந்துகளை விற்பனை செய்து வருகின்றன. அதில் குறிப்பிட்டு சொல்லும் அளவுக்கு மெட் பிளஸ் மருந்தகங்கள் செயல்பட்டு வருவதால், இன்றைக்கு சிறிய சிறிய நகரங்களில் எல்லாம் மெட் பிளஸ் மருந்தகத்திற்கு வரவேற்பு அபரிதமாக கிடைத்து வருகின்றன.

காலம் காலமாக தனியர் மருந்துகள் எம்.ஆர்.பி. விலைக்கே விற்பனை செய்து வந்த நிலையில், மெட் பிளஸ் 20 சதவீதம் தள்ளுபடி என்று அறிவித்தது பொதுமக்களிடம் அதிர்ச்சி கலந்த ஆச்சரியத்தை ஏற்படுத்தியது. அதன்பேரில் மெட் பிளஸ் மருந்தகளுக்கு அமோக வரவேற்பு கிடைத்த நிலையில், ஆயிரம் ரூபாய்க்கு மேல் மருந்துகள் வாங்கினால்தான் 20 சதவீத தள்ளுபடி கிடைக்கும் என்று நிபந்தனை விதித்தாலும் கூட,  உயிர் பயத்தை ஏற்படுத்தும் நோய்களால் பாதிக்கப்பட்டவர்கள், ஆயிரம் ரூபாய்க்கு மேல்தான் மாதந்தோறும் வாங்கிக் கொண்டிருக்கிறார்கள் என்பதால், மொத்த மருந்தில் 200 ரூபாய் தள்ளுபடி என்பது அவர்களுக்கு மகிழ்ச்சியான ஒன்றுதான்.

மருந்து விற்பனையில் இந்தளவுக்கு எல்லாம் தள்ளுபடி வழங்க முடியுமா என்று மெட் பிளஸ் ஆச்சரியப்பட வைக்கும் நேரத்தில், சென்னை வடபழனியில் உள்ள ஃபோரம் வணிக வளாகத்தில் உள்ள ஆரோக்யா மருந்தகம், புற்றுநோய் உள்ளிட்ட குறிப்பிட்ட சில நோய் தாக்குதலுக்கு 40 சதவீதம் அளவுக்கு தள்ளுபடி தருகிறது என்ற தகவல் மேலும் ஆச்சரியத்தை ஏற்படுத்துவதாக உள்ளது. இப்படி 20 மற்றும் 40 சதவீதம் அளவுக்கு மருந்து விற்பனையில் சலுகை தர முடிகிறது என்றால், உண்மையில் மருந்துகளின் விலை எவ்வளவு இருக்கும்? அதன் அடக்க விலை எவ்வளவு வரும் ? என்று வியப்பூட்டுகிற கேள்விகள் எழத்தான் செய்கின்றன.

இப்படிபட்ட சந்தேகங்களை மேலும் மேலும் அதிகமாக்கும் வகையில், மத்திய அரசால் தொடங்கப்பட்டுள்ள பிரதான் மந்திரி திட்டத்தின் கீழான மக்கள் மருந்தகத்தில் அதிகபட்சமாக 90 சதவீதம் அளவுக்கு சலுகை விலையில் மருந்துகள் விற்பனை செய்யப்படுகிறது என்ற கூற்றை ஆராய்ந்து பார்த்தால், மருந்து விற்பனையில் தனியார் விற்பனையாளர்களும், தனியார் தயாரிப்பு நிறுவனங்களும் மனசாட்சிக்கு விரோதமாக அடித்து வரும் பகல் கொள்ளை ஆவேசம் கொள்ள செய்கிறது.

40 சதவீதம் அளவுக்கு சலுகை தரும் ஆரோக்யா மருந்தகத்தில் ஆயிரம் ரூபாய்க்கு விற்பனை செய்யப்படும் மருந்துகள், பிரதான் மந்திரி திட்டத்தின் கீழ் செயல்பட்டு கொண்டிருக்கும் மக்கள் மருந்தகத்தில் வெறும் 300 ரூபாய் அளவுக்கே விற்பனை செய்யப்படுகிறது என்பது எந்தளவுக்கு தனி மனிதர்களுக்கு அதிர்ச்சியளிக்கும் என்பதை யூகிக்க கூட முடியவில்லை.  

மருந்து விற்பனையில் பகல் கொள்ளையை விட வழிப்பறி கொள்ளயைர்கள் போல நடந்து கொண்டிருக்கும் இந்த அநியாயத்தை இத்தனை ஆண்டு காலம் மத்தியில் இருந்த காங்கிரஸ், பாரதிய ஜனதா உள்ளிட்ட அனைத்துக் கட்சித் தலைவர்களும் அனுமதித்து வந்திருக்கிறார்கள்  என்று சொன்னால், மக்கள் மீது இவர்களுக்கு எல்லாம் எந்தளவுக்கு அக்கறை இருந்துள்ளது என்பதான் பிரதான கேள்வியாக இருக்கிறது.

 மக்களால் தேர்வு செய்யப்பட்ட மக்கள் பிரதிநிதிகள், நோயால் பாதிக்கப்பட்டு ஒவ்வொரு நாளும் உயிர் பயத்துடனேயே வாழும் மக்கள் மீது கூட கருணை காட்டாமல், தனியார் மருந்து தயாரிப்பாளர்களின் வளர்ச்சியில்தான் அக்கறை செலுத்திக் கொண்டிருந்திருக்கிறார்கள் என்றால், உலகமே போற்றும் ஜனநாயகத்திற்கு உண்மையாக இருந்து கொண்டிருக்கிறதா, இந்தியா?

2008 ஆம் ஆண்டில் அப்போதைய காங்கிரஸ் தலைமையிலான கூட்டணி அரசில் மக்கள் மருந்தகம் (JAN AUSHADHI) அறிமுகம் செய்யப்பட்டிருந்தாலும் கூட 7 ஆண்டுகளுக்குப் பிறகு, அதாவது 2015 ஆம் ஆண்டில்தான் நாடு முழுவதும் மக்களிடையே இந்த மருந்தகம் பிரபலமடைய துவங்கியிருக்கிறது. மக்கள் மருந்தகத்தை நாடு முழுவதிலும் மக்களிடம் கொண்டு செல்வதற்காக தேசிய முற்போக்கு கூட்டணி அரசும், பிரதமர் மோடியும் தனி இயக்கமாக இதை எடுத்துச் சென்றதால் இன்றைக்கு சிறிய, சிறிய நகரங்களில் கூட மக்கள் மருந்தகம் விற்பனை துவங்கியிருக்கிறது.

ஒரு மாதத்திற்கு தேவையான மருந்துகளை 250 ரூபாய் அளவுக்கு வாங்கிக் கொள்ள முடியும் என்கிற போது, அந்த மருந்துகளையே தனியார் மருந்தகங்களில் 1000 ரூபாயோ, அதற்கு மேல் பணம் கொடுத்துதான் இத்தனை காலம் வாங்கிக் கொண்டிருந்தார்கள் மக்கள் என்பதை உணரும் போது, விளிம்பு நிலை மற்றும் நடுத்தர மக்களின் துயரத்தை கண்டும் காணாமல்தான் மத்திய, மாநில அரசுகள் செயல்பட்டு வந்திருக்கின்றன என்றால், மக்களுக்கான அரசாங்கம் என்று எப்படி பெருமை பட்டுக் கொண்டிருக்க முடியும்.

மருந்துகளின் உற்பத்தி செலவு மிகமிக குறைவு என்கிற பட்சத்தில், அதன் விற்பனை விலை மட்டும் 100 சதவீதம் லாபம் என்ற அடிப்படையில் இத்தனை காலம் தனியார் மருந்தகங்கள் விற்பனை செய்து கொள்ளை லாபம் அடித்து வந்த நிலையில், மிகவும் காலதாமதமாக விழித்துக் கொண்டுள்ள தமிழக கூட்டுறவுத்துறை, ஒவ்வொரு ஊரிலும் ஒன்றுக்கு மேற்பட்ட விற்பனை மையங்களை போர்க்கால அடிப்படையில் திறந்து, மக்கள் மருந்தகம் விற்பனை செய்யும் சலுகை விலைக்கு இணையாக மருந்துகளை விற்பனை செய்ய துரிதமாக செயல்பட வேண்டிய நேரமிது.

அடக்க விலையைவிட 20 சதவீத லாபத்தில் விற்பனை செய்தால் கூட தமிழக அரசுக்கு பல்லாயிரம் கோடி ரூபாய் அளவுக்கு வருமானம் ஆண்டுதோறும் கிடைக்கும் அளவுக்கு பொன் முட்டையிடும் வாத்து போலவும் அட்சயப் பாத்திரம் போலவும் விளங்கும் கூட்டுறவு மருந்தகங்களை, டாஸ்மாக் மதுபானக் கடைகளின் எண்ணிக்கைக்கு இணையாக திறக்க தமிழக அரசு முன் வர வேண்டும்.

டாஸ்மாக் மதுபானக் கடையின் மூலம் கிடைக்கும் வருமானத்தில் பாதி அளவுக்கு மருந்தகங்கள் மூலம் கிடைக்கும் வாய்ப்புள்ளதாக ஓய்வுப்பெற்ற அரசு மருத்துவர்கள் நம்பிக்கையோடு கூறுகிறார்கள்.

வரும் காலங்களில், அதிக எண்ணிக்கையில் கூட்டுறவு மருந்தகங்களை திறக்கும் அதே நேரத்தில், அதே எண்ணிக்கைக்கு ஏற்ப டாஸ்மாக் மதுபானக் கடைகளின் எண்ணிக்கையையும் குறைக்க தமிழக அரசு, மனம் தளராமல் மனஉறுதியோடு நடவடிக்கைகளை மேற்கொள்ள வேண்டும் என்பதே ஆரோக்கியமான சமுதாயத்தை விரும்பும் தமிழ் ஆர்வலர்களின் வேண்டுகோள்…

One thought on “டாஸ்மாக் மது விற்பனையை ஈடுகட்டுமா, மருந்து விற்பனை வருவாய்! …”

Leave a Reply

Your email address will not be published.