திமுக தலைவர் மு.க.ஸ்டாலின், தான் போட்டியிடும் சென்னை கொளத்தூர் தொகுதியில் இன்று வீதியில் நடந்துச் சென்றும், திறந்த ஜீப்பில் பயணம் செய்தும் வாக்கு திரட்டினார்.

அப்போது அவர் பொதுமக்களிடம் வாக்கு சேகரித்து பேசினார். அதன் விவரம் இதோ……

எதிர்க்கட்சி வரிசையில் இருந்து கொளத்தூர் தொகுதிக்கு ஆற்றிய பணிகளைவிட, முதல்வராக 10 மடங்கு கூடுதல் பணிகளை ஆற்றி, தமிழகத்தின் ‘மாடல்’ தொகுதியாகக் கொளத்தூரை மாற்ற விரும்பும் என் எண்ணத்தைப் பகிர்ந்து, உதயசூரியன் சின்னத்தில் என்னை ஆதரிக்குமாறு கொளத்தூர் மக்களை வேண்டுகிறேன்.

மழை வந்தாலும், வெயில் அடித்தாலும் உங்களை சந்திக்க ஓடோடி வந்திருக்கிறேன். கொரோனோ காலத்தில் உங்களை வந்து சந்தித்தேன். 
தமிழக தேர்தலையொட்டி, மாநிலம் முழுவதும் சென்று பரப்புரையில் ஈடுபட்டேன். உங்களுக்கு நன்றாகவே தெரியும். ஊரார் பிள்ளையை ஊட்டி வளர்த்தாலும், தன் வீட்டுப் பிள்ளை தானாக வளரும் என்பது உங்களுக்குத் தெரியும். அந்த வகையில்,மற்ற தொகுதிகளுக்கு எல்லாம் பரப்புரைக்குச் செல்வதற்கு நீங்களே என்னை அனுப்பி வைப்பீர்கள் என்பது எனக்கு நன்றாக தெரியும். திமுக ஆட்சிக்கு வந்தவுடன், தமிழகத்திற்கு முன்மாதிரி தொகுதியாக கொளத்தூரை மாற்றி காட்டுவேன். 
இவ்வாறு பேசிய மு.க.ஸ்டாலின், முன்னதாக, சைதாப்பேட்டை, வேளச்சேரி, விருகம்பாக்கம் தொகுதிகளில் போட்டியிடும்  திமுக வேட்பாளர்களை ஆதரித்தும் பரப்புரை மேற்கொண்டார்.