புதுச்சேரியில் காங்கிரஸ் ஆட்சி கவிழும் சூழ்நிலை ஏற்பட்டுள்ள பரபரப்பான நேரத்தில், காங்கிரஸ் தலைவர் ராகுல் காந்தி இன்று தேர்தல் பரப்புரையில் ஈடுபடுகிறார். அவரின் வருகையையொட்டி, பாரதிதாசன் மகளிர் கல்லூரி மாணவிகள் கலக்கலான வரவேற்பு வீடியோவை வெளியிட்டுள்ளனர். அவரவர் தாய்மொழியில் பேசி வரவேற்றிருக்கும் காட்சி, பார்ப்போரை நெகிழ வைத்து வருகிறது.

முதல் நிகழ்வாக முத்தியால்பேட்டை சட்டமன்றத் தொகுதிக்குட்பட்ட சோலை நகர் மீனவ கிராமத்தில் பெண்களை சந்தித்து ராகுல்காந்தி உரையாடுகிறார்

தொடடர்ந்து, பாரதிதாசன் மகளிர் கல்லூரி மாணவிகளுடன் ராகுல்காந்தி கலந்துரையாடுகிறார். தேர்தல் பரப்புரை மேற்கொள்வதற்காக புதுச்சேரிக்கு வரும்போது தங்கள் கல்லூரிக்கு தவறாமல் வர வேண்டும் என்று மாணவிகள், ராகுல்காந்திக்கு இ.மெயில் மூலம் அழைப்பு விடுத்தனர். அதனை அவர் ஏற்றுக் கொண்டுள்ளார்.

கலந்துரையாடல் நிகழ்வுகளை நிறைவு செய்தவுடன், ரேடியர் திடலில் நடைபெறும் பொதுக்கூட்டத்தில் ராகுல்காந்தி பேசுகிறார்

4 எம்எல்ஏக்களின் ராஜினாமாவினால் காங்கிரஸ் கூட்டணி அரசுக்கு ஆபத்து ஏற்பட்டுள்ள நிலையில், துணை ஆளுநர் கிரண்பேடி பதவியில் இருந்து நீக்கப்பட்ட நிலையிலும், புதுச்சேரியில் அரசியல் ஸ்திரமற்ற சூழல் நிலவிவருகிறது. காங்கிரஸ் அரசு நீடிக்குமா, கவிழுமா என்ற குழப்ப நிலையில் புதுச்சேரி மக்கள் இருந்து வரும் நிலையில், ராகுல்காந்தியின் இன்றைய வருகை அரசியல்வாதிகளிடம் மிகுந்த முக்கியத்துவம் பெற்றுள்ளது.

கல்லூரி மாணவிகளின் கலக்கலான வரவேற்பு காங்கிரஸ் நிர்வாகிகளிடமும், தொண்டர்களிடம் மிகுந்த உற்சாகத்தை ஏற்படுத்தி வருகிறது. அவரவர் தாய்மொழியில் பேசி, ராகுல்காந்தியை வரவேற்றிருப்பது, பார்வையாளர்களை வெகுவாக கவர்ந்து வருகிறது.